- انت يا راجل يا مغلبني
يا قاهرني ودايما تتعبني
= يافتاح يا عليم يا وليه
بقى ده كلام وش الصبحيه
- يعني أقوم كده ألقى الحله
فاضيه ياخويا وزي الفله!
= هعمل ايه مانا كنت جعان
راجع من شغلي وتعبان
ألقاكي مخلصه عالعيش
وأدور على حاجه مافيش
- حد بياكل محشي وليه؟
ويخلصلي الحله كمان
بص يا راجل شيبتك اهيه
فاكر روحك زي زمان؟!
= يعني يا شيخه أبص لمين
ما تشوفي مين فينا تخين
- أنا يا حبيبي لسه صبيه
والأكل كمان يمري عليا
= يرضيكم أبقى بوشين
وأقول لها يا عود الياسمين!
حتى الوزن معدي 200
وعيالها زي زكيبتين
= يللا يا ستي مجتش عليهم
أكلوا الحله قبل ماجيهم
كل اللي أكلته صوباعين
- طب ما تزوقش اخص عليك
اه يا مفتري اه ياجوزي ياقاسي
هتشوف لو ما فتنت عليك
وهقوِّملك أبويا وناسي
= يا وليه ما تقولي يا صبح
ليه اصحا على وصلة ردح
هاتي من الآخر يا مدام
طلبك ايه وسيبيني أنام
- عايزه اتفسح اروح السيما
واشتري جزمه عليها القيمه
واتأنجش ف إديك ف الشارع
وأغيظ الست ام نعيمه
= ياه دنا ناسي ورايا أشغال
- يوم الجمعه مافيش أشغال
= في أشغال انا ماشي سلام
- عيني عليا يا ناس ده حرام
