راجل قوي

"خيال الضل
آخر حاجه ممكن إني أكونهالِك"

فاكرها زمان؟

"ويوم ما احس إني القزم
هـ (كهِّن) كل ما بيننا
وهعتبره من ال(هالِك)"

وانا مرضتش من جوايا
بس قبلت
بنار تحرق ف أحلامي
وإنت اللي تكون ليّ
بدالها كيان

~~~




لما رسمتك ( سنوهوايت )

اللي بتحضن بين كفينها نهار

و بترسم على وش الفجر البسمة

- شروق –

ما قصدتش أبدا

إني هاكونلك

واحد م الأقزام السبعة

~~~



ولا أقدر يوم عليك أكبر


ولا عمري هكون (عملاق)


دا نا مشتاقه اكون عقلة صباع جنبك


تشيلني جوه جيب ساند على قلبك


لكن بستني زي ما سبت كل طموح


مندمشي..مااقولشي ياريت


ولا اتحولش جوه البيت


مجرد شيء

..................................





عارفه

أنا بعشق ضعفك

وبشوف فيه قوه

ماهو لولا الليل

مايبانش جمال القمره

ولولا الشوكه اللي بتجرح

ماتبانش الوردة الحمرا

ولولا الشدّة ف وقت الضيق

متبانش طيبة قلبي

و لا خوفي عليكي

..............................


عمر الشده ما كان إعرابها.. كلمة حب

ولا عمر القسوه ف درس حساب

بتكون حصيلتها.. طيبة قلب

خايف ليه؟

وليه عاشق ظلام الليل مع القمره

ومالها الشمس لما النور بيملا الكون

بتصبغني بدفاها واحب اكون سمرا

واحب العشق مش خايف

وادوب ف كلامك المجنون

هاقولك ايه

خضوعي بقوتي أجمل

واكون شامخه قصاد غيرك

وانا ف ايدك كما الخاتم

لكن راضيه

................................


طب تفتكري

لو عنتر كان حابس نفسه

ف سجن قصايده الرومانسية ف عبلة

وما شالش القلب على اكتافه

بيحارب طواحين الخوف

لو عاش يكتب ليها وبس

و يبوس طرف السيف و الرمح

علشان ترضى

كات هاتحس بحبه و ترضى ؟؟

و اما يقولّها مرة يا جاهلة

و الخيل تعرف أكتر منك

إيه سكتها

غير الخوف مغموس ف الحب

و انا مش هاقبل اكون غير عنتر

و انت يا إما تكوني عبلة

بجمال عبلة

بقوة عبلة

بضعفها جانبه

بحنيتها و خوفها عليه

يا إما انا رافض

دوري ف عرضك

هو: سامح رخا

عتاب تامر وشوقية

زعلانه
وعاتبه عليك
ورافضه حتى لمس ايديك
وهتكلم مع نفسي
مع الحيطه
مع المطره على الشباك
ولا اتكلمش تاني معاك
تخبي عني احزانك !
وييجي غريب ويحكيلي!
على راسك تدق طبول
تخبيطه .. ف تخبيطه
وانا ولا كنت دريانه!
يا ظالمني
وواخد حقي اني ابقى ال أقرب لك
وانا اللي عايشه علشانك
دا ياما لما كنت تتوه
بدمي كتبت عنوانك
ولا حجه هترضيني وتشفعلك
وحتى لو هكون وياك
بطيّب قلبك المجروح
فانا جوايا زعلانه

~شوقية~



ومستنيه أتأسف؟
واقولك يعنى سامحينى؟
مش إنتى برضه كنتى زمان
بنظرة عين تحسينى؟
ومهما ضحكى كان يعلا
ويملا الدنيا حواليكى
أنا قلبى بيفضل صفحه مفتوحه
بتقريها
وتطويها بكفيكى
وبين كل العيون القاكى بصِّالى
تطبطب عينك الحاسّه بأوجاعى
على وجعى
فاحس ان الدفا بيسرى ف أوصالى
وتأمرنى عينيكى انسى الوجع
أنسى
وتأمرنى عنيكى ارتاح
أقول لسه
يادوب لسه بدق الباب على قلبك
وساعة لما يسألنى
أقول أنا مين ؟
يضيع إسمى...فاقول حُبك
مكنش غريب مابيننا ف يوم بيتكلم
وكنا لما نتقابل
عيوننا تنور الدنيا
ف ساعة لما بتضلم
ولسه فاكره دلوقتى....؟؟؟!!!
بإنك -ياللى أقرب ليا من نفسى -
ماهوش إنتى ؟
وعاتبة عليا إكمنك
خلاص مش قادره زى زمان تحسينى؟
ولا عيونك - وليِّة أمرى -
قادره تاخدنى ....على شطك ترسينى؟
ورافضه لمسة الإيد اللي
كانت ياما بتحاوطك؟
وكانت ياما بتشيلك
ف ننى العين وبتحطك؟
أنا عن نفسي
حلمس كل شئ إيدك - كانت لمساه
وابوسه واشيله ف عنيا
يا حلمى المستحيل أبدا ف يوم انساه
ولما تفضفضى للحيط وللشباك
أمانه تغمضى عنيكى
لإنى هناك
على الحيطه
حتلقى الصوره بصٍّالك وبتعاتبك
وع الشباك
حتلقينى كطير واقف
بيسأل هو فين قلبك؟
وجرحى لو ف يوم حيطيب
حيفضل بالألم نازف
فلو لسّاكى زعلانه
وعاتبه عليا
سامحينى
أنا آسف

~تامر~



ياخبر ابيض
دنا ال طلعت غلطانه
حبيب قلبي مانيش ناسيه ولا غافله
معقوله!!
عايزني لسه زي زمان!
كأن الدنيا عاملالنا 200 حفله
احط ايديه جوه اديك
وراسي كمان على كتفك
نلف ندور
وحوالينا جدايل نور
مش معقول!
يانور عيني
د لو شايفني مشغوله
فبيك شغلي
تحب الأكله مظبوطه
فبظبُطها
وما تطقشي
تلاقي الفوضى ف الأوضه
أرتبها
ولا عالحيطه شخبوطه
وعايزني كمان
أحط ستايري عالموضه
أفصلها بإيدي وذوق حبيب قلبي
وأعلقها
ولو غايب على لساني كلام حبي
بحبك لما تلسعني سخونة الزيت
واحبك وقت تلميعي تراب البيت
واحبك وقت ما بتفرح بأولادك
نضافتهم
وضحكتهم
ووقت طلوع نتايجهم
ومهما شقيت
مانا عارفه أكيد تعبان
ومش شايف عيوني وهي شقيانه
فيكفيني
رضاك باللقمه والترتيب
وتسلم ايدِك اما تقولها تواسيني
وكنت اتمنى وقت الشده تندهلي
تقوللي يا غاليه تستاهلي
يكون قلبك ف همي قريب
وكنت اتمنى تقرا الشوق ف أحوالي
ونتسند سوا عالعشره والطيبه
ماهو يا غالي
معدش مابيننا شغل صغار وحبّيبه

~شوقية~



ياريت نصغر
ياريت نرجع عيال تانى
ونتقابل
وتتشبك ايدينا العاشقة من تانى
يا واحشانى
بقالى كتير
ماشفتش عينك المُندهِشة باستمرار
كأنك لسه دلوقتى
يادوب دلوقتى شايفانى
بقالى كتير ماحستشى
برعشة ايدك المكسوفة ف إيديا
واعاتبك ليه
مانا الواكل
وانا الشارب
وانا النايم
على الفرشة المثالية
بكام ممكن اجيب حد يراعيلى البيت؟
ومين يقدر يدوِّب قلبى حنيه؟
وحشتينى ...كأنثى وبس
مش داده
ولاطباخة
ولا حتى
كزوجة ف بيت
وانا مش زوج ولا والد
ف ساعة لمّا بشتاقلك
بكون عاشق
وماله لما اقول حبيت
ما ياما كتير اخدنا الحضن واللهفة
وياما استنتينى كتير
وانا استنيت
بقى معقولة هو انتى الى حبيتها؟
وبرضه انتى اللى كنتى كتير مواعدانى؟
بشمعه لهفة تفضل قايدة ف عيونك
ومهما العمر يطفيها
بشوقنا رح تقيد تانى
وهو انتى اللى كان شعرك
كـ ليل يشرق على كتافى
وتدارى ف احضانى!!!؟
خلاص يا شريكة الرحلة
رفعت الراية واستسلمت
رضيت بالباقى من ذكرى
ماليش غيرها ومهما حاولت
لا يوم رح نبقى حبِّيبة
ولا راجعه ليالي الشوق
وحفضللك انا الراجل
ما نيش عاشق
ماهو انتى اقصى احلامك
تكونيلى
مجرد ست

~تامر~

تامر: الشاعر ياسر رزق

الحرب قايمه

حرب قامت

وانت غافل عنها ليه

يللي قلبك هو درعي

واحتواءك يبقى جيش

لو ماتديني الحصانه

هتقهر

هبقى مافيش

لسه صامده ومش بسلم

واسقي زرعي

نفسي اسمع من شفايفك"متخافيش"

مش مصادفه اني شفتك

ألف مره بتتفتن

من سكات

حبلي يتمدد ويوصل بين ايديك

وبحناني بتعتصم

النوبادي العركه عندي

جوه صدري ألف غاره

خدني ليك

عايزه اهرب من متاهات المغاره

طب فاهمني؟

وللا قدام كبرياءك

اللي هو مش شطاره

ننهزم؟

كداب

كداب وانت بتحضني ومتلهف وبترفع دقني بإيدك وتبص ف عيني وتحلف لحظه وبتدفن عينك ف كفوفي بتبوسهم؟ لأ انت بتهرب وشفايفك على ايدي بترجف حاسه برعشتهم وبدمعه بتزيد خوفي وايدين بارده بتحاول تكدب مش عارفه وانا سامعه من غير ما تقول من امتى؟! بتحاول تكدب على قلبي! طول عمره ف صدرك مش عندي فمهوش معقول وانا مش هسأل ولا تفرق أعرف مين هي اللي بيفرق اني اتعودت انك ليّ هسكت وهسيبك كداب

منك لها

يا يومي يا صابح

بين الشقا والهم

بكره كما امبارح

حبة نكد على غم

ولإمتى هنقاوح

غسيل نشف واتلم

حطيت مكانه غسيل

عيل عشان المم

فاتحلي زوره عويل

جاري معندوش دم

وزعيقي له جلاجيل

يللي انت لايمني

أول ما جيت بالليل

كيل وناولني

مانا ناقصه هدة حيل

ليه الزرار سايب

وللا الشراب مخروم

طيب ماهو دايب

حاله معاك مظلوم

ايه يعجبك يا عم

يللي تصيح "غضبي"

عارفه انه لو يحصل

ملعونه من ربي

يللي واعدني الويل

يوم الفراخ جايب

كتكوت تفاريحي

وتقول طبيخ خايب

والمحشي اورديحي

وللا اما جبت لحوم

خلي الكلام مكتوم

حتايه على طبقك

وادي العيال حته

وام العيال تضحك

طبعا ماليش نايب

اتهدت الجته

وعنيك على شيبتي

والتريقه ف بؤك

دايما على خيبتي

رجل الحمار اشتكت

والشاطره رخره بكت

والغزل صار هلاهيل

يا يومي يا مروح

أحلى مافيك الليل

الصمت بيريح

لحسن يفيض الكيل

يللي انتي هارياني

طلبات ورا طلبات

ولاتشوفيش وشي

إلا وتقولي هات

نازل على شغلي

ساعة صلاة الفجر

دمي يفور يغلي

ف اليوم 7 مرات

يضحك ف وشي الغدر

ولا قلت كفَّاني

داير ورا رزقي

والساقيه تاولاني

وارجع ف اخر الليل

بتمنى وش صبوح

أو حب جي يرقي

ويرد فيّ الروح

إن جبت يوم لحمه

تبقى عجيبه تكش

والفرخه ف الطبخه

معرفش ليه بتفش

وتعايري ليه خيبتي

ولا صنتي يوم غيبتي

يا مهلهله سيرتي

طاب انزلي انتي

وريني ايه جبتي

حتى العيال عارفين

اني معاكي حزين

صبري نفد لكن

هسيبكو بس لمين

كلمات

العمر اللي راح بيسيب علاماته تحزن عليه؟ طب ليه! حدش قدر ينتصر على كل مافاته! نحسبها م الأول ايامنا هتطوِّل؟ ده مصير ما يتحول عن كل من ماتوا

الخوف لو ملك القلب يضيع

هتخاف من ايه داانت ف ايده

وال فاكر نفسه عليك بيصيع

زيك زيه كووووله عبيده

التسليم بالامر الواقع

بيشيل احتمالين

اما تخليك واقع ضايع

او تحسبها يا زين

الدمعه حبة ميه بارده او دافيه تغسل عيون مش قلب بلاقافيه منها اللي صادق بالندم م الروح واللي بالمسكنه يفلح عن العافيه الأمل ده له مرادف لو بغيره يستحيل اسمه صبرك واوعى تزهق أو تميل أصله صعب وهتلاقيه مشوار طويل انما توصل لآخره ماتلاقيش ف الدنيا ليل

هوى

وجع الدماغ والقلب أو كل الوجع القلب داقه من زمان وما ارتجع ياللي تعوز تسمع حكي الهوى قرب وشد حيلك ده الهوى عايز جدع

قال يبقى ايه الهوى انا قلت ايه غيري انا اللي كنت الدوا ولافيت على طيري ياللي تغنى الجوى تابع خطى سيري دالعمر لما انطوى غرّق عليك خيري

حط حبك في الميزان واوزنه بمزان دهب حط قدامه الجنان او شويه من التعب سيب لقلبك العنان بس حاسب م الشغب دالمعافره مع الزمان مش عبث ويا اللعب

في

في ناس بتضحك حظها كده في الحياه وناس تقول اهه وعشمها اخرتها ياللي بتضحك وعمرك ما دوقت الآه ليه تنسى ناس الشقا ضانن بلقمتها

مهما يطول الصبر بييجي يوم اخره ماهو لما حبل الصبر اتشد عن آخره فمن يظن الحليم عمره ما جاب آخره مهما يطول حلمه غضبه اهوه ف آخره

يا اسكندريه

البحر ساحر العشاق ومبيكرهش حد وحسن النيه عشمهم في وقت المد ولما بريحه ياخدهم وبالدوامه يخنقهم كان اللي كان ولا لقوشي لشوقهم رد

جميله الدنيا

جميله النظره للدنيا من العين اللي بتقاوح تصر تشوف حاجات تانيه غير اللي عدت امبارح **** جميله ان حد ينساها ومين يقدر على ذلك ده كل الناس بتهواها تحايلها بسؤال مالِك؟ **** جميله ازاي وبالدمعه وطعم الملح في حلقي لكن بالحلم والشمعه بحاول للصمود اسقي **** جميله عشان انا نفسي تكون حلوه وصافيالي وترسي زي ما ترسي تضل الضحكه بقيالي **** يا دنيا نفسي استقوى على نفسي وحزن الكون واقاوح الأسى وأقوى ولا يصيبني بهمي جنون **** جميله النظره للدنيا ده لو عايز تكون موهوم و للفرحه قلوب تانيه و قلبى بالجراح موصوم

حكايات كده

كان وياما كان في عمق الزمان ناس اشتكت قالت وحكت انه من النوادر يبعت لك القادر صديق وفي وصبوح والصدق منه يفوح عدى زمان وزمان وبنقرا ف الحكايات الكل قال فهمان لكن ف وقت الجد... راجع يقول صدمات!! عجبي كان ياما كان تاجر فتح دكان ينزل يصلي الفجر يدعي في ليلة قدر ومحله يكبر ويكبر ويحط يافطه تنور ماشالله والله اكبر وزبيبته فوق الجبين كبيره زي البدر تيجي تقول له الزكا يقول اجيبها منين وعجبي كان ياما كان واحده تقول للناس انا بنت ناس يا ناس وطلعتي بهيه والمستوى غيركم واسمي تاج راسكم كلامي ليكو تواضع من باب مراضيه تدخل تصلي تلاقيها قالبه المصليه مطرح رؤوس الناس بتحط رجليها وتحط فرشه نضيفه لراسها وعينيها لكن عشان قرشها الذل يكويها وعجبي

كان ياما كان واحد عرف نفسه يهمس دنا غلطان وقام كتم همسه يزعق على اهله ويغطي في غلطه مايقولش انا ندمان لو سيف على رقبته وتشوفه لو مع حد والكل بيلطش واللي يقول ما ترد يكتم وبيطنش قال يعني متسامح طيب وبيصالح ويدادي ويحسس يرجع على اهله يتفش ويغلِّس وعجبي

كان ياما كان واحد وبيقاسي من ظلم المفترين ويلف ليه الزمان لكن صبح ناسي قادر على المساكين ويشوف اثار الغلب معلمه ف عمره يزيد غليل القلب لكن عجيب امره لما الدراع اتشد مابقاش ف قلبه ود غله على المساكين وعجبي كان ياما كان واحد ربه عطاه الصحه واداله وياها الستر اتبطر قال هملا جيوبي وابدُر من جنيهاتي بفرحه وابقى ف وسط الكبارات قطر وانفي اللي يقف وسط دروبي من يتحدى راح اعصره عصر وف لحظه طلع نورالبدر كل الحلم اتحقق ليه كل القوه بقت ف ايديه لكن جت له شوية كحه واتاخد وياها الصبر راحت منه خلاص الفرحه مات زعلان وتاواه القبر وعجبي كان ياما كان قلب ياعيني متغرب حزين من الغربه واللي غريب يهوّن غربته صاحبه وفاكره قريب ولما في الشديد جرب لقى الغربه ماهيش اوطان بقى يدور ومش لاقي ولا انسان يعدي اليوم وراه اليوم وضحكه نحيب عرف انه ورغم القرش كان غلبان لعن يوم جاله وسواسه وخلاه هج من ناسه ويتمنى حيطان داره عرف انه ماعاد له شيء ف مقداره ولا صحبه ولا ضحكه ولا له كيان طلع منها نفخ جيبه بفيض خُسران ملا ايدينه دفع دينه بكل محبه للمساكين لحق نفسه ووفى يمين رمى قروشه ومات كسبان وعجبي

كان ياما كان اتنين في حالهم عايشين هاديين حبايب بالطيابه والرضا ماشيين طلع ليهم ف مره شيطان جميل الطلعه يتشكل في صورة حلوه جنيّه بتتصاحب وتتدحلب و راسمه وش حنيّه ونيّتها ما يعلم بيها غير الله وفي دماغها مانيش عايزه خلاص الاه وتحرِب لما تتمكن وتخرب كل ما يمكن ومشيوا وراها يا خيبيتهم وخربوها وضاعت بيها ضحكتهم يلوموها وهما احق باللومه مادام الحكمه وقت الشده معدومه ومين غيرهم يكون غلطان وعجبي

قال فنان!

ياللي الفنون واخداك والفتنه مش سايباك ومنسياك دينك فنك عليك مكتوب قلمك وكان مشبوب دلوقتي هيدينك بتموت وتتّاوى بذنوب ما تتداوى هتزيد وتشينك قلت الجسد رمزي قلت المجاز يجزي ويزيد مريدينك والكلمه قاعدالك بتموت وتبقالك بتعد ضالينك انا ياما قلت وعدت تزهق وانا ما سكت ووعودي جايينك فكر كده وقدّر عن كل شيء عبر من غير شياطينك هيصه وصقِّيفه ف القبر كالجيفه ولّوا وسايبينك مين فينا راح يفرح ف الجنه له مطرح والشهره ما تعينك ده احنا بنتنشق على حسنه تتلألأ لما يحين حينك

يا بني انطق

ياللي الهوى صنعتك اما الغنا لعبتك واما يحين الجد تهرب على وحدتك ياللي لسانك يقول وفي القصايد يطول ولما ييجي الحبيب صمتك مهوش معقول ياللي الغرام فايتك وهي دي حكايتك واحده ومتكرره مالك سوى مرايتك ويجرى ايه يا جدع لو سر قلبك طلع وقلت منه حديت طبيعي مش مصطنع آه السكوت حكمه رغيك مالوش لازمه لكن فبعض الاحاين صمتك يكون ازمه لو قلب يستناك ليه تتعبه وياك يعني رضيت تبكيه وللا الغرض ينساك يابني ده سلو الرجال عشان مايمشي الحال لزما يقول اللسان كلمه تقيم الوصال خلاصه انا قلتها تتهنى لو خدتها واحلف ماتلقاني جيتلك وكررتها عقلك سبب كاسك عرفت بيه خلاصك ولو تشيل قربه هتخر على راسك

يا شايب ويا شايبه

يا شايب وعايب وفى العشق دايب وداير تخايل قلوب البنات وانتِ يا خايبه وصابغه يا شايبه ونفسك فى غنوه ووصلة آهات ومالك يا دنيا يارايحه يافانيه تغرّى اللى عقلوا بحبة حاجات وينسوا عقولهم وحكمة سنينهم وباعوا عملهم بلهوة ساعات عرفنا التهور وحلم التصور ولكن بنكبر نلم الشتات وليه يابنى نادم وتنفخ ف عادم وعايز ترجع شباب ذكريات ياعالم حوشونى ده هيجـننونـى وقارهم ده روّح وودع وفات اذكر وافكر واحكى واكرر واخر مابنصح يصيبنى السكات ياربى سلامى واحسن ختامى وافضل بحكمـه لحد الممـات

يارب

تعدي عليّ الأيام وفيها الحلوه والمره وتتبقى خيال ذكرى ف مره تهل تفرِحني ومره تجيني تجرحني واقول يارب ولا بتمنى يا ربى تنسينى ولا برضه تفكرنى انا بتمنى ياربى تجيب لي الخير وتجبرنى وتكتب صبري عالأحوال في ميزانى وتنصرني على نفسي كأول شيء ومن بعده على مرّى وعلى حزنى يارب مايوم تنسّيني اكون شاكرك وحتى في عز افراحي أكون فاكرك وعمر لساني ما يغلط وانا ذاكرك وتجعلني في عز الجرح أرجعلك والاقي الراحه في قربك وتديني اني اقول يارب واحسّك آمين يارب

حبيب عمري

حبيب عمري وراح عمري لقيت الشيبه هدِّتني رجع فكري سنين صبري لقيت ذكرايا حبتني مسكت الخصله البيضه على راسي لقيته ورايا متبسّم ومش ناسي وضحكه كبيره من قلبه تطمِّنّي ابص لوشي متجعّد على مرايتي ألاقي ضحكته بتفرد على حكايتي سلام وحنان وحب كبير يأمِّنّي وكل دقيقه من عمري سابت ذكرى ولسه ياما هتكرمش مع بكره وآه يا ضهري يا محني من الأحمال ببصمة جهد-مش ضايع على فكره وبتلفِّت ألاقي حبيبي شايفني وقاري كل ماف عيني وجيّ يبوسني في جبيني يهدِّيني بدون كلمه يغنِّيني.. كما الموال

قطايف

لو مره النور زغلل عينك العيب فى النور وللا ف عينك النور لو زاد قدام عينك متخافشى ده خير جى يزينك متغمضشى وافتح عينك *×*×* ياغلبان ايه غلّبك؟ مالقتش فرشه تلمّنى مالقتش لما الدمعه سالت حضن حَب يضمنى مالقتش لما الجوع قرصنى لقمه ناشفه تسدنى والغلب لما يطول علىّ خافوا م الحُرقه اللى فىّ خافوا لما شيطانى يقدر للقساوه يشدّنى *×*×* الاحباب مش عارفه ليه متفرقين كنا زمان دايما سوا متجمعين واللى يتوه ييجى هنا عالاستراحه يلقى فى عز الحر نسمايه وراحه يارب تجمعنا سوا دنيا ودين *×*×* مراسينا ترسينا ف حضن الشوك وييجى النور يعدينا بوجه ضحوك نلاقى نفسنا هربنا من الانوار عشقنا وللا ادمنا جراح الشوك *×*×* الكلاب فى الحقيقه مخلوقات راقيه و وفيه تفتدى روح من تحبه لو فى وشها بندقيه ياللى بتسب الخسيس توصفه بصفة الكلاب اوعـى تغلـط فى الكـلاب بالكلـمه ديه *×*×* العاده وللا البصره اهو كله كوتشينه والفاضى يعمل قاضى ويطلعه علينا ياحكومه نسفت بلدنا وعطلوا ايدينا عالقهوه قعدوا شبابنا ومين يواسينا *×*×* اه اه ياعصفور كم لفيت وكم بتدور طيب آخر كل ده ايه برضه تتاوى قلوبنا قبور ياعصفور *×*×* معلش يا محدود ربك كبير موجود بكره الجمال هيعود والحزن ينسانا معلش لو موعود دلوقتى مش مسعود بكره الزمان هيجود وهتحلى ويانا *×*×*