إيمان

هي تواصل مع خاطرة تحمل إسم إيمان تلومها على قسوتها

هل كل الإيمان لا يحمل للمعشوق سوى بحر حنان إن تضربني أمي يوما إن تقسو كي أنسى حلما أو عنفني لسان أبي حين رأى عوج بمطلبي أوليس بقسوتهم إيمان أوليست تحمل كل حنان أعرف ذلك حين أعود أحتاج الحب الممدود لا ألقي نفسي بصدر طبطب بل أرجع للحزم المشدود أطلب عونا ليريح القلب المكدود كي أنسى حلما آخر أرقني أطلب صدقا في صدر محب عنفني كي أرجع وأظل إيمان

كلمات

العمر اللي راح بيسيب علاماته تحزن عليه؟ طب ليه! حدش قدر ينتصر على كل مافاته! نحسبها م الأول ايامنا هتطوِّل؟ ده مصير ما يتحول عن كل من ماتوا

الخوف لو ملك القلب يضيع

هتخاف من ايه داانت ف ايده

وال فاكر نفسه عليك بيصيع

زيك زيه كووووله عبيده

التسليم بالامر الواقع

بيشيل احتمالين

اما تخليك واقع ضايع

او تحسبها يا زين

الدمعه حبة ميه بارده او دافيه تغسل عيون مش قلب بلاقافيه منها اللي صادق بالندم م الروح واللي بالمسكنه يفلح عن العافيه الأمل ده له مرادف لو بغيره يستحيل اسمه صبرك واوعى تزهق أو تميل أصله صعب وهتلاقيه مشوار طويل انما توصل لآخره ماتلاقيش ف الدنيا ليل

الفلاحيس

وسئل الكاتب عن معنى فلاحيس فقال هم الملاحيس إن تفلسفوا اممممم خلونا في موضوعنا يحكى انه جاء فلحوسا فقال لزملائه : عايز أرسم صوره عريانه انفعل واحد وقال :إختشي .. أنت معندكش حيا فلحوس آخر: سيبك منه ده أصله متخلف فلحوس ثالث : أمشي يابني روح شوف لك سكه بعيد عننا وابقى شوف مين هيعبرك... بكره تشوف مهتعرفش تكلمنا واحنا نجوم المجتمع ينصرف ال غير فلحوس باكيا وهو يدعو عليهم وعلى من مكنهم مما يفعلون الفلحوس الثالث يتابعه ببصره ثم يعود ليقول : المهم كيف تقنع الناس بإبداعك فيها كي لا يرفضوها مثل هذا "العبيط" الفلحوس الأول : بسيطه هرسم النيل والهرم في الخلفيه وكده تبقى رمز لمصر والعري رمز التخلص من الثياب الرثه التي تشوهها فهي جميلة ان عادت لطبيعتها .. ايه رأيك؟ الفلحوس الثاني يقفز ويهتف : هااااايل برافو يا واد بس عندي فكره تجنن الفلحوس الأول: اتحفنا الثاني : ترسم جنبها راجل عريان كمان ويبقى رمز للشعب الوطنى اللي بيصونها الفلحوس الثالث يرفع حاجبيه : فكرة رائعة. بس هتبرر بإيه انه عريان؟ الثاني بشموخ: طبعا بالوضوح والشفافيه اللي هم أساس الحفاظ على الوطن الأول يسرح ويرسم أشياء بيده في الهواء ثم يهز رأسه ويقول - في حاجه ناقصه.. يتساءلان سويا - ايه؟؟؟ - أجعلهما في وضع اندماج ليكون التعبير كاملا عن ذوبان الوطن في قلب الشعب وذوبان البطل الوطني في أرض وطنه يهتفان : راااااااائع يتعاونوا حتى ينتهوا من الصورة المجسدة ال.. بديعه (يمكن مصابني) يتقزز الناس منها لكن يستطيع الفلاحيس اقناع بعض الملاحيس بالفكرة كل فلحوس أقنع 10 ملاحيس وكل ملحوس اقنع 7 ملاحيس آخرين وكل ملحوس منهم أقنع بعض الملاحيس أيضا ومن هؤلاء الملاحيس خرج بعض الفلاحيس الجدد الذين يستمرون على الطريق ويقنعون الملاحيس أكثر وأكثر والمصيبه اللي محدش واخد باله منها العداد بيعد (( وإن عليكم لحافظين كراما كاتبين يعلمون ما تفعلون ) ) وبعدين (( اقرأ كتابك كفى بنفسك اليوم عليك حسيبا )) ماهو ياجماعه أصل (( ومن دعا إلى ضلالة كان عليه من الإثم مثل آثام من تبعه لا ينقص ذلك من آثامهم شيئا)) وتوته توته خلصت الحدوته

عقول

ولا بالكلام ولا بالسكوت تقدر تقول ماخلاص بقى مابقاش بيوصل للعقول هل الكلام فوازيره صعبه عالدماغ وللا الخلايق رضيوا للعقل الأفول

هوى

وجع الدماغ والقلب أو كل الوجع القلب داقه من زمان وما ارتجع ياللي تعوز تسمع حكي الهوى قرب وشد حيلك ده الهوى عايز جدع

قال يبقى ايه الهوى انا قلت ايه غيري انا اللي كنت الدوا ولافيت على طيري ياللي تغنى الجوى تابع خطى سيري دالعمر لما انطوى غرّق عليك خيري

حط حبك في الميزان واوزنه بمزان دهب حط قدامه الجنان او شويه من التعب سيب لقلبك العنان بس حاسب م الشغب دالمعافره مع الزمان مش عبث ويا اللعب

يا رسول الله

ايا رسول الحق والحق خالد ورسالتك في كل قلب صامد مهما تناسوا وارتضوا بالمظهرِ فاتوا بحجة الإبداع لب المخبرِ فرسالتك بوضوح قد أديتها وما من حجة تبقت بعدها أنت الذي بينت ما حاك لنا حرمته حتى ليصلح حالنا فاشفع لنا عند الكريم الواحد

يا نيل

هعود تاني بأشجاني وهارمي كل أحزاني بذور وادفنها على شطك وراح تكبر وتطرح ورده مرسومه بلون خطك ولا تمرر د حتى الحزن لو تسقيه يصير سكر وقلبي برضه لو تضنيه هعود تاني سلام يا عم وجداني

اللي ما يتسماش

اللي مايتسماش ده يبقى حوض المطبخ والمواعين كل ما بدخل اشوفه قصادي اخرج منه بقلب حزين ادي ايديه نقحوا عليّ من التقشيف كل ما افضّي يرجع يملا بشكل مخيف يعني هبطل اوكل بيتي وللا احط لهم ف رغيف امري لربي بحاول احبه واقنع نفسي بانه خفيف يللا ثواب وفاتح لي الباب اغرف منه واقول يالطيف هسكت وهحب المواعين

اللي مايتسماش آه ياني عايز قصه ده يبقى لساني غصبٍ عني فالت مني كل مواقفه بتخليه مبقاش عارف فين اخفيه الف مصيبه عليها رماني نفسي في يوم انسى اللوم القى النوم مرتاح قلبي بفرحته جاني بسكوتي اخيرا هناني خايف احتاس وياه والقاني وقعتي سوده ومره بلاني اصلي استاهل قطع لساني اللي ما يتسماش

اما انا عندي اللي ما يتسمى ضارب مخ حبايبي علاوله حتى اللى انا فاكراهم كُمَّل واللي في ف يوم فكرت عتاوله ليه بيخليهم مطاطين ليه بيغرّقوا راسهم طين كله من اللي ميتسماش خوف على لقمة عيش من مين وأصرخ فيهم ده الرزاق هو وبس اللي تطاطوله واللي يقول راح يقطع عيشكم بالفم المليان تقولوله رزقي في ايده مش من جيبك حاطط ثقتي في الخلاق تهديدك حتى مايسواش

ده اللي يهدد منه تسيبك واوعى تطاطي اوعى تطاطي للي في عرفي ميتسماش

اللي مايتسماش ده يبقى غلب العيال يصحونى بدوشه واتمسى مِيت موال ياواد بطل خناق يابت بطلي زن ناقصه ف عز الطبيخ الاقي تليفون يرن اللي مايتسماش مربوط معايا في ساقيه تطلع شمس النهار تلاقي العجل دوار يلف يلف يلف والعقل قرب يخف والراحه اماني نائيه لما خلاص يناموا تتبدل الأحوال تبدأ سعادة الامومه واتحط زي الشوال يطلع نهاري بنور نبتدي تاني ندور ويا اللى مايتسماش

اللي ما يتسماش سهر الليل مشغول فكري ورايا مواويل اشي موال الشغل وهمه واشي موال الطبخ يا دمه وللا كمان لو عندي مذاكره للأولاد أو عندي غسيل وللا بنيه مسكت فيّ سهرت تلعب طول الليل اللي مايتسماش بقى اسمه هدة حيل

اللي مايتسماش ياولاد قال ايه حساس عامل نفسه ارق الناس عاشق للستات ولهان وشايفهم بعيون فنان بالالوان همساته بصوت واطي حنون وحقيقته انه رد سجون لو يخرب دنيتهم يجري يعمل زي ابو(ه) الشيطان ما اغويتكم ولا لهيتكم عقلك كان فين يا انسان اللي مايتسماش بيغني ف كل مكان حاسب على بنتك يافلان احسن حسه رقيق ومؤثر واكل عقل بنات الناس مانا قلتلكم واد حساس

أيها الكاتب الساخر

احيان كده احتاج ...اضحك آجي عندك واقرا الكلام واضحك واسيب الصفحه ازعل تاني ارجع هنا واضحك العيب مش هناك العيب هنا عندك ليه لما بتكتب مش بتخلي الضحكه طويلة المفعول

في

في ناس بتضحك حظها كده في الحياه وناس تقول اهه وعشمها اخرتها ياللي بتضحك وعمرك ما دوقت الآه ليه تنسى ناس الشقا ضانن بلقمتها

متقسمين

ياترى الناس صحيح متقسمين؟ ناس مبسوطين ناس غلبانين ناس مرتاحين ناس محروقين ناس في الحياه رايقه ناس عايشه متضايقه طيب هييجي يوم ويبقوا مقلوبين هيحلوا دولا محل دول وللا انكتب على كل واحد بس واحد م اللونين

غشيم

غشيم وحب يتكلم داخل ياعيني يتعلم وقع ف وسط الناس اللي لا يوم فهمت ولا بترحم غشيم قال كلمتين اعجاب وفاكر ان دول اصحاب غلط حبه وتاه حبه وقلبه يا عيني متعشم وقال ايه الرد بنصيحه ولا كانت سوى فضيحه ونسيوا (رفع الحرج) ف الدين بيترتب مع السنه مكانه اهم