عقول

ولا بالكلام ولا بالسكوت تقدر تقول ماخلاص بقى مابقاش بيوصل للعقول هل الكلام فوازيره صعبه عالدماغ وللا الخلايق رضيوا للعقل الأفول

متقسمين

ياترى الناس صحيح متقسمين؟ ناس مبسوطين ناس غلبانين ناس مرتاحين ناس محروقين ناس في الحياه رايقه ناس عايشه متضايقه طيب هييجي يوم ويبقوا مقلوبين هيحلوا دولا محل دول وللا انكتب على كل واحد بس واحد م اللونين

غشيم

غشيم وحب يتكلم داخل ياعيني يتعلم وقع ف وسط الناس اللي لا يوم فهمت ولا بترحم غشيم قال كلمتين اعجاب وفاكر ان دول اصحاب غلط حبه وتاه حبه وقلبه يا عيني متعشم وقال ايه الرد بنصيحه ولا كانت سوى فضيحه ونسيوا (رفع الحرج) ف الدين بيترتب مع السنه مكانه اهم

موال الأصيل

نامت قوالب يا "جدع" هو كده لساك جدع؟ اللي بيحكم مش جدع ولا فينا واقف واد جدع يا ويل ضميري من الوجع *** لما اللي بيقولوا "ابن ناس" سابوا لخادم إبن .."ناس" طلعوا الولاد من أي ناس! سبتو ولادكم ليه يا ناس طلعوا العيال من غير أساس *** وآدي ألف آهه من الألم ومالوش دوا غير الألم بيهون ألم لما الألم بيجد فوقه كتير ألم ومين يواسي اللي انظلم *** لما الغرور يملا النفوس والعتمه تغلب عالنفوس فين البصيره يالنفوس ومين يخاف رب النفوس! معقول ده كله م الفلوس؟!

حاله

اليها:

عشان انا ماما وانتي أحلى بنوته

هقول شايفه كلامك كله حدوته خيال في خيال بديتي وقلتي واحشني صدقتي وباينه في النني ونسيانك لحبه محال روحيله قوليله وصتني ماماتي وشدتلي ودني وداعيالكم بحسن الحال يابنتي البيت يكون هادي لو الأخيَر يكون بادي وبيروّق لخله البال ولو حيه تبث السحر حواليكم تفروا منها وللا تفرقوا اديكم؟ بحبك تبطلي الأعمال

اليه على لسانها:

لو تقول انا مش بحسك عمري برضه مااصدقك دا انت كلك حته مني وقلبي عمره بيعشقك لو تقول حاجز ما بيننا يوم بيكبر أقول خيال الحقيقة هي كوننا جوه بعض معشّقين لو كلامنا ف مره شابه كل قسوة الجدال مهما نقسى وقتها جوانا قلبين مظلومين لما انت اللي تقول انك بتقدر تبتسم وان دمعي لم تشوفه مهما جوايا اترسم يبقى فين كل اللي قلته يوم ما جتني وخدتني ده انت كنت حبيبي وانت اللي قلت عرفتني لما ابقى في انفعالي غلطت مره طب وماله مانت عارف غيرتي واللي يغير ده حاله نار تقيد ولا تنطفي غصب عني تشدني يبقى تقسي وليّ تنسى وللا تيجي تضمني؟ لما بزعل بفتكر غنوه قديمه من زمان "معلش النوبادي عشان خاطري" شوف كده بتقول يا غالي ايه كمان "ده انا لولا بحبك يا حبيبي مزعلش ولا آخد على خاطرى" هل هتفهم وللا برضه راح تعاند انت عارف قصدي ايه بعترف انك صبرت كتير يا جامد بس ال يتجوز يا بيه مهره لعروسته هديه اما عمله لربه صبر وخد عليه مش عشان ان مراته مفتريه لكن اللي حنانها خلى نقص العقل ف وصفها لو بقلبك يا حكيمها تحتويها.. راح تهدّي قلبها والله ما يكون العشم انك ف لحظه تقول وداع ده اللي بيننا راح نموت لو منا ضاع اوعى تنصر الأبالسه فوق ملايكة حبنا اوعى تترك للشيطان فرصه يسرق حقنا وانت من ف ايديك خلاصنا وانت حاكم امرنا انت عقل البيت ياراجل وانت حارس عشقنا واستخير خدني وياك ندعي يللا ونستجير واوعى تيأس ده الفراق هو السعير حس بيّ وشدني هتلاقيني عقلت تاني وابني وياك عشنا

الكنزي .. و النزهي

تدور وتدور وبتعدي عشان القرش مليون سور وتنسى الراحه وبترمي وراك قلبك ولا تهزك ولا أجمل بنات الحور تشوف كنزك بيتكوم بحس مريح وييجي قبل ما يدخل حنان جيبك بتخرب حاجه ورا حاجه تعوز تصليح ويخرج بالدموع قرشك وبيسيبك ومره يصادفك النشال يقوم صايبك ماهوش رزقك ولا حظك ولا نايبك ولا برضه بتتعلم وتبسط كفك المدبوح وجري الوحش بيخلّي الهنا سايبك وآدي الشعر زي البدر..في لونه لكن عالوش سواد الليل ترك لونه وهدة جتتك تاخد كتير م التل وآخرتها قصاد عينك بدأ يختل وتتقال لك بوش صريح على نفسك تقفلها وترضى الجور وتكنز لينا ياخالي هنا وسرور بنيته لجل خاطرنا بعمر جريح ماهو النزهي أحق بصرفه ويا الريح ويتعايق ويتريق على شيبك يقول حقي .. ومش عيبي ده كان عيبك وتعرف آخر المشوار عشان تتعل وعقلك عللي راح منك خلاص انشل ومين يقدر يجيب لك عمر بدل العمر وتحلف لو تلاقي سنين تعز الروح وقرشك هينه ولا نفسك ف يوم تنذل ده قرش يروح بييجي بداله بالقرشين لكن عمرك يروح منك تجيبه منين وحسبه صعبه ماتوصل قصادها لحل وتبكي يقولوا لا تندم على المكتوب تقول بايديه خليته لبن مسكوب ويانزهي اللي ييجي سهل بيروح سهل ولو تركن على مالي ما يكفي شهر وبرضه ينوبك الآخر شوية قهر ودمعه اليوم على عمره ال عدى ف ليل وفيضه لن يقف حتى يفيضبو النيل ماعنده خلاص سوى درسه لمن يفهم يشوف أمسه غلب نفسه واهو بيندم ماشفتش حد بيحوّش لضي الشمس ف خزانه ولما في المسا تغرب يلاقي الخزنه مليانه وطلّع حلمه م الخزنه لقاه مخروب حكايه طويله من همسُه لمن هيحب يتعلم

جواكي طيبه

جواكي طيبه رغم القسيه والغرور جواكي شعله من الغضب لكن في وقت الشده نور انت الكبيره وانا اللي جنبك لسه نونو مستجير لسه بيحلم انه بيجرب يطير وساعات عينيكي بنظره تلسع غلطتي اصلي مانيش في كل خطوه بستخير وانت عندك مِيت سبب لكن انا شايفهم غلط يتمرد العقل الجسور ليه تفضلي كرباج بيسلخ دنيتي ليه تخسري وبدون زعل لمحبتي ساعات يكون قلبك صبور وساعات رهيبه مش حاسه ليه بصراخي زاعق والكلمه دايما "واد مراهق" صيغه عجيبه تخلي قلبي يتمنى افوتك واترجى يوم القا سكوتك وكلام كتير مش ينكَتَب راح تفهميه وسط السطور يمكن يكون مش م الأدب لكنه احساس الأسير اللي معدي على الزمان زيك زمان جواه كتير فاكره في يوم سبتي اللعب واما اشتكوا كل التعب منك كمان وللا انتي غير وما فيكي الا كل خير وانا ليه مُدان من عينيكي المستريبه صدري طهق عقلي زهق واحشني اشوف جواكي طيبه

فضفضة واحد متغاظ

ليه ال متدلع سلامته يشكي اكتر مل دنياه هدته واللي متضايق في صمته وال رايق ليه بتعلا شكوته انظر حولك شعار بجد ومش كلام تليفزيونات شوف حقيقة ال يصرخ م الآهات شوف يا متدلع تعالى ايه همومك وانت دفيان وانت شبعان وانت متطمن وبالبارفان حمومك ليه بتشكي يابن آدم من مافيش ده الرضا نعمه وبيها راح تعيش واللي شايف كبر همه يستحي شويه يا دمه يجري يسمع غم غيره راح تهون قدام عيونه بلوته وآااااااااه ياني

ليه يا بنتي تيأسي

يابنتى ليه تيأسى وتلعنى ف خيبتك طبيعى لوتهربى وقفلتى باب اوضتك ماهتشوفيش الشر فى القلوب ضدك بس برضه مش هتشوفى خير لو تفتحى بابك ويضوّى شباكك طبيعى انك تقابلى الجرح م الناس.. دول كتير بس برضه هتشوفى الجمال فى الغير قومى شدى الحيل قومى شوفى الطير ده يغنى ده يهاجم غيره من صغار الطير زى ناسك ده يحن وده يضن ده بقلبه يوفى زى الخيل ده يغشك ده يضمك ده تلاقى قلبه اسود من ظلام الليل هى دى الدنيا جاهدى فيها هى سكه وان شفتى ايامها طويله ابدا حقيقة امرها فعلا قصيره شدى حيلك فيها هتلاقيها صعبه ايامها ف عينيكى؟ جنب الصعب تلقيها يسيره بكره بعد الدرب نوصل فى اخر حلمنا لحبة تراب اما جنه واما خلد فى عيشه كرب واللى فاكرنها بتروى نكتشف كانت سراب يبقى نعرف ان الدنيا حرب اقفلى عليك الف شباك الف باب شدى الف ستاره تقفل كل ضى ابعدى عن كل دار عن كل حى يبقى فين اللى تقابلى بيه حسابك فين عمل هتقولى يوم يحيى ترابك ده عملته ده الم فى يوم حملته ده دُعايا وهم شلته يشفعولى فى يوم حسابى انى ما ضاع من شبابى يوم ماكنتش فيه ف حرب قومى شدى الحيل ياشابه قومى يللا وحبه حبه بس ادعى فى كل كرب سمى قبل ما تمشى درب كل خطوه بتتكتبلك حرف حرف كل هم وكل كربه لو فى مره تاه قلبك فى غربه ارجعى لله وقولى جيت يارب وامسكى فى حبل الوصال من كل طرف

لما الجمل يبرك

لما الجمل يبرك مين راح يكونلك سند فاكر زمان شيلتك فرحان بضم الولد؟ كساك شوية ريش خلاك تقول هتعيش ولو تشوف نفسك ريشك مغطي مفيش ياللي تبيع صبري وتدوس على خاطري حيرت فيك امري وحزنت على امرك معقوله تنسى الكبير! لجل العضام وِهنت طيب ده حتى الكبير بيشتريله كبير لو الدماغ فهمت عمرك صادفت الجمال لما يفيض المر؟ اخر مشال لاحمال طقت حيطان الصبر الصمت مش مستديم ده بس طول باعها تسمع كلام اللئيم تسكت وتبلعها ولما فاض كيلها كل الأسى مُجتَر وانت فخور انك كبرت على أهلك! ده اللي مزغلل عيونك ندَّاهـه بتشـدك انا عمري مفرح فيك يا دمي يا ضهري ده انت اللي يجرى ليك هيكون سبب قهري عارفك كتير تفرك لو حد قال لك بخ طب فين هتلقى المدد لو الجمل هينِخ التوقيع: ابوك

حدث النهارده

جميله هيّ بشعر اسود وعيون بريئه وجايه ليّ اكشف عليها بس الحقيقه مش عايزه تيجي مش عايزه تعمل ايتُها حاجه ماما مسافره وبابا قالت بس بلجاجه سايبنا بابا وله مراته عايش حياته وازاي انا ادخل عمليه وحدي انا عايزه ماما عمرك ياطنطي شفتي قدي؟ ادخل واخرج وانا لوحدي مش ممكن اطلع مع اللي ماتوا! وديت لو أقدر ابكي معاها لكن عشانها حطيت لدمعي الفين ستاره هبكي قصادها هيصعب اكتر عليها حالها طيب يابنتي عمرك ده كام قالت حداشر وبالتمام تفتكري يكفي اكون كبيره؟ وابقى لوحدي؟ ماهيش شطاره وبالاماره جواكِ شايفه حزنك عليّ قلتلها والله انك اميره والفهم فعلا مش بالعلام قالوا لها طيب ابوكي يمضي لازم يوقع اقرار خطوره البنت فاهمه وكمان صبوره مسكت تكلم ابوها ييجي قال هبقى آجي لما افضى ليكي بكت وقال انا عايزه ماما هستنى ماما يمكن اموت؟ وماله برضه هتفرق ايه وانا يعني حلو ف حياتي ايه مش قادره اكمل مشيت بكيت واتمنيت انساها لكن اهو عدى يومي وما نسيت

مفترق

يصعب علىّ العشره وان كانوا بس يومين وصلت وياك ياصاحبى لمفترق طريقين فى يوم حكيتلى مشاكلك وشفت دمع العين نوبه قدرت احايلك وقسيت عليك نوبتين كنت افتكرك ياصاحبى حقك علىّ النصيحه لكن جفيت ونسيت وكرهت كلمه صريحه وبعدت عنى..اكمنى..حنبل ماليش وشين

اشارة مرور

اشارة مرور واقفه عشان حتة وزير وللا حمار حرنان فى وسط الزحام وللا خفير حاول ينظم خط سير اما الوزير دى هينه ديتها حبة وقفه فى الطريق واما يعدى حضرته تضحك عليه على غفلته على عقل غره ف دنيته واما يقابل ربه هتبان نيته يعرف ساعتها يعنى ايه مسؤول كبير مسؤول من اللى وحده حقه يسأله ويحطه فى اللى يستحقه ف اخرته اما الحمار يحرن ماهو من حقه بعد ما يتظلم ده يضربه ده يحمّله طيب ويعنى مره من نفسه حرن مره يقول اه يا زمن يبقى عشانه لو شوية انتظار تبدى احترامك للى شافه م الالم وتبقى فاهم حق قلبه اللى انطحن اما الخفير حاطط على دماغه وشم الطيور اللى تطير قالوا يقف واهو جه وقف ولا حد عامل له اعتبار واهو بس محتاس ليل نهار والله تعب من بس طول اليوم صفير والكل باصص انما فين الضمير طيب بقى اصبر شويه اكسب ثواب الوقفه ديه قاطع سيجارتك قاطع البيبسى كمان قاعد فى سيارتى بأمان وحتى لما فى اخرتى القى الكتاب جى فى ايديه تقول ياربى بحمدك لا انا هنا مسؤول كبير ولا ضربت ف حمار مستجير ولا مره زهقت نفسى من غفلة خفير وبقلب راضى تفتح اشارتك كمل وروح بص ف مرايتك راح تلقى بسمه نورت بساعات من الصبر الجميل بس احتسبها عند ربك